პროექტი მიზნად ისახავდა გურიისა (ოზურგეთის მუნიციპალიტეტი) და კახეთის (თელავის მუნიციპალიტეტი) რეგიონების თემში მცხოვრები სოციალურ-ეკონომიკურად მოწყვლადი ბავშვებისა და მათი ოჯახების სოციალური ფუნქციონირების გაუმჯობესებას, ბავშვთა დაცვის ადგილობრივი სტრუქტურების გაძლიერებით.

საქართველოს ეს-ო-ეს ბავშვთა სოფელს პარტნიორობას უწევდნენ ადგილობრივი არასამთავრობო ორგანიზაციები - „ახალგაზრდა პედაგოგთა კავშირი“ და „კახეთის სამხარეო განვითარების ცენტრი“.
სამი წლის განმავლობაში, პროექტი მოემსახურა 1042 ბავშვს, 149 მშობელს, 473 მასწავლებელსა და ბავშვთა დაცვის 74 ადგილობრივ სპეციალისტს.

შეიქმნა არაერთი საგანმანათლებლო რესურსი, მათ შორის საინფორმაციო ვიდეორგოლები და ბროშურები ბავშვთა უფლებებისა და ბავშვთა შრომის შესახებ.

კრიზისში მყოფი ოჯახების გაძლიერების მიზნით, მშობლები და ბავშვები ჩაერთნენ პოზიტიური მშობლობისა და ბავშვთა უფლებების, მცირე ბიზნესის წარმოების, ბიზნეს გეგმების მართვის, დასაქმებისათვის აუცილებელი უნარების განვითარებასთან დაკავშირებულ ტრენინგებში, გარდა ამისა, მიიღეს სახელობო განათლება და შეიძინეს პროფესია სხვადასხვა პროფესიული კურსის მეშვეობით.
ეკონომიკური გაძლიერების პროგრამაში ჩაერთო 129 ოჯახი. 50 ოჯახს გადაეცა აგრო გრანტი და მიიღეს ექსპერტთა მხარდაჭერა სტარტაპისთვის. 53 ოჯახის შემოსავალი გაიზარდა 20%-ზე მეტით (საშუალოდ 39,5%).

ბავშვთა დაცვის ადგილობრივმა სპეციალისტებმა აიმაღლეს კომპეტენცია კრიზისში მყოფი ოჯახების საჭიროებების შეფასებისა და ინტერვენციების განხორციელების მიმართულებით.
ადგილობრივმა მუნიციპალიტეტებმა გაიზიარეს პროექტის გამოცდილება და დანერგეს ადგილობრივი სოციალური პროგრამები კრიზისში მყოფი ბავშვიანი ოჯახების მხარდაჭერის მიზნით.